မြန်မာနယ်စပ်အနီး ထိုင်းနိုင်ငံ၊ မဲ့တံ့တိုက်နယ်ကနေ ဘန်​ကောက်မြို့ကို သယ်ဆောင်သွားမယ့် WY​ စိတ်ကြွမူးယစ်ဆေးပြား ၅၀,၀၀၀ ကို ဇွန် ၁၅ ရက် မွန်းလွဲ  ၂ နာရီခွဲလောက်က မယ်လမတ်ရပ်ကွက် ၅  စစ်ဆေးရေးနေရာမှာ  ထိုင်းစစ်တပ်က ဖမ်းဆီးမိပါတယ်။

ထိုင်းစစ်​ဆေး​ရေးဂိတ်မှာ မူးယစ်ဆေးတွေ တင်လာတဲ့ ကားတစီးကို  ထိုင်းယာဥ်​မောင်း နိုင်းနလား၊ မြန်မာနိုင်ငံသား ထွန်းထွန်းဝင်း (၄၂နှစ်)၊ နိုင်လင်းဦး (၂၇နှစ်)၊ ဆွေဝင်း (၁၈နှစ်)နဲ့ နန်း​ဖော (၁၄နှစ်) တို့ကို ထိုင်းစစ်တပ်က ဖမ်းဆီးလိုက်တာပါ။

အဆိုပါ​ မူးယစ်ဆေးတွေကို အမည်မသိသူတယောက်က ထိုင်းယာဉ်မောင်းကို ဖုန်းဆက်ပြီး သယ်ခိုင်းခဲ့တာလို့ ထိုင်းကားသမားက ထွက်ဆိုပါတယ်။

ဒါ့အပြင် မြန်မာနိုင်ငံသား ၄ ယောက်ကိုလည်း ခေါ်ဆောင်လာခိုင်းတဲ့အတွက် ယာဥ်​မောင်းက အပို​ငွေအဖြစ် တယောက်ကို ဘတ် ၅၀၀ ရရှိမှာဖြစ်တဲ့အတွက် တာ​ဆောင်ယမ်းမြို့၊ မယ့်တံ့တိုက်နယ် ​ဆေးရုံအ​ရှေ့မှာ သွားကြိုလာခဲ့လို့ဆိုပါတယ်။

စိတ်ကြွဆေးပြား ၅၀,၀၀၀ ကို အိတ်တလုံးထဲမှာထည့်ထားပြီး ဘန်​ကောက်မြို့ တံတားအောက် နေရာတခုကို ပို့​ဆောင်ရမှာဖြစ်ကာ ဒီအတွက် အခကြေးငွေ ဘတ် ၁၀၀၀ ရရှိ​တယ်လို့ ကားသမားက ထွက်ဆို ပါတယ်။

မြန်မာနိုင်ငံ​မြောက်ပိုင်းအပါအဝင် မြန်မာပြည် ဒေသအနှံ့ WY​ စိတ်ကြွမူးယစ်ဆေးပြားတွေ ပျံ့နှံ့နေပြီး ထိုင်းဘက်ကို မှောင်ခိုသွင်းကာ ထိုင်းကို ​ကျော်ဖြတ်ပြီး တတိယနိုင်ငံကိုလည်း ပို့​ဆောင်ကြတာ ရှိပါတယ်။

ဖမ်းဆီးရမိ​တဲ့ မူးယစ်ဆေးပြားတွေနဲ့ တရားခံလို့ ယူဆသူ​တွေကို တရားဥပ​ဒေအတိုင်း အ​ရေးယူနိုင်ဖို့  တာခ်ခရိုင်၊ မယ်လမမြို့မရဲစခန်းကို လွှဲပြောင်း​ပေးအပ်သွားပါတယ်။ 

အလားတူ ဇွန် ၁၄ ရက်မနက် ၁၀ နာရီကျော်ကလည်း မြဝတီကနေ မဲဆောက်ကို သယ်လာတဲ့ စိတ်ကြွဆေးအပြား တသိန်းကို ချစ်ကြည်ရေးတံတား အမှတ် ၁ စစ်ဆေးရေးဂိတ်မှာ ထိုင်းရဲတွေက ဖမ်းမိခဲ့ပါသေးတယ်။