ကချင်ပြည်နယ်၊ ချီဖွေမြို့မှာ မေခမြစ်ရေတက်လို့ အနိမ့်ပိုင်းတွေ ရေမြုပ်နေပြီး ဇွန် ၂ ရက် ဒီနေ့မှာတော့ တောင်ကျရေပါ ဆင်းလာတယ်လို့ သိရပါတယ်။
ဒေသခံတယောက်က “ရစ်လော်ခေါင်ရပ်ကွက်က (ရေဆင်းလို့ မြုပ်တာ) ပိုများတယ်။ တခြားရပ်ကွက်လည်း နည်းနည်းပါတယ်” လို့ ပြောပါတယ်။
လွန်ခဲ့တဲ့ ၂ ပတ်လောက်ကစလို့ ချီဖွေမှာ မိုးရွာနေတာဖြစ်ပြီး မေ ၃၀ ရက်မှာ ရေတက်လာတာကြောင့် စစ်ရှောင်တန်းလျား ၁၀ ခုထက်မနည်းနဲ့ ဒေသခံအိမ်တချို့ မျောပါ ပျက်စီးခဲ့ပါတယ်။
ချီဖွေမှာ ရေအကြီးဆုံးဖြစ်ခဲ့တဲ့ မနှစ်ကထက် ဒီနှစ် ရေပိုများပြီး ရေတက်နှုန်းမြန်တာကြောင့် အနိမ့်ပိုင်းက အိမ်တွေ ပစ္စည်သိမ်းချိန်တောင်မရဘဲ ပျက်စီးဆုံးရှုံးကြရတယ်လို့ သိရပါတယ်။
ဇွန် ၁ ရက် မနေ့မနက်ပိုင်းက ရေနည်းနည်းပြန်ကျသွားပြီး နေ့လယ်ပိုင်းမှာ ရေပြန်တက်ခဲ့သလို ဒီနေ့မှာ မိုးလည်းရွာနေပြီး ရေကြီးနေတုန်း ဖြစ်ပါတယ်။
ကချင်ပြည်နယ် မိုးလေဝသဦးစီးမှူးကလည်း ဧရာဝတီမြစ်ရေရဲ့ အခြေအနေကို သူ့ရဲ့ ဖေ့စ်ဘွတ်ခ်ကနေ ထုတ်ပြန်ပေးနေပြီး ဒီမနက် ၇ နာရီခွဲအချိန်က မြစ်ရေဟာ မြစ်ကြီးနားမြို့ရဲ့ စိုးရိမ်ရေမှတ် ၁၂၀၀ စင်တီမီတာထက် ကျော်လွန်သွားခဲ့ပြီး ၁၁ နာရီခွဲမှာတော့ ရေပြန်ကျတာကြောင့် စိုးရိမ်ရေမှတ်မှာ ရှိနေတယ်လို့ ဆိုပါတယ်။
စစ်ကောင်စီဩဇာခံ မိုးလေဝသဌာနကတော့ မြစ်ကြီးနားမြို့မှာ ဧရာဝတီမြစ်ရေဟာ နောက်တရက်အတွင်း ၁ ပေခွဲလောက် ထပ်တက်လာနိုင်တယ်လို့ ထုတ်ပြန်ထားပါတယ်။
