ပြီးခဲ့တဲ့ မတ်လတုန်းက လှုပ်ခတ်ခဲ့တဲ့ အင်အားပြင်း ငလျင်ကြောင့် ထိုင်းနိုင်ငံ မြို့တော်ဘန်ကောက်မှာ အထပ်မြင့်တိုက်ပြိုကျလို့ ပိတ်မိနေသူတွေကို ရှာဖွေကယ်ဆယ်ရေးလုပ်ငန်းတွေ လုပ်ဆောင်နေရာမှာ နောက်ထပ် အသက်ရှင်သူတွေ ထပ်မံမတွေ့ရှိဘူးဆိုရင်တော့ နောက် ၂ ရက်အတွင်း ကယ်ဆယ်ရေးလုပ်ငန်းတွေ ရပ်ဆိုင်းတော့မယ်လို့ The Nation Thailand သတင်းမှာ မေ ၇ ရက်က ဖော်ပြပါတယ်။

ဘန်ကောက်မြို့တော် အုပ်ချုပ်ရေးအဖွဲ့ (BMA) တာဝန်ရှိသူတွေရဲ့ ပြောဆိုချက်ကို ကိုးကား ပြီးတော့ ခုလိုဖော်ပြလိုက်တာဖြစ်ပြီး ငလျင်ဒဏ်ကြောင့် ဘန်ကောက် ချတ်တူချတ်နယ်မြေမှာ အထပ် ၃၀ အမြင့်ရှိ ဆောက်လက်စ စာရင်းစစ်ရုံး အဆောက်အအုံ ပြိုကျခဲ့ကာ အပျက်အစီးတွေကြား ပိတ်မိပျောက်ဆုံးနေသူတွေကို အချိန် ၁ လကျော်ကြာ ရှာဖွေကယ်ဆယ်ရေး လုပ်ငန်းတွေ လုပ်ဆောင်လာခဲ့တာပါ။

ကယ်ဆယ်ရေးအဖွဲ့တွေဟာ ပြိုကျအဆောက်အအုံရဲ့ အရေးကြီးဇုန် ၃ ခုထဲမှာ ပျောက်ဆုံးနေသူ ၁၂ ယောက်ကို ရှာဖွေတွေ့ရှိနိုင်ဖို့ အရှိန်မြှင့်လုပ်နေတာ ဖြစ်ပါတယ်။

သဘာဝဘေးအန္တရာယ် ကာကွယ်ရေးနှင့် လျော့ပါးရေးရုံး ညွှန်ကြားရေးမှူး ဆူရီရာချိုင် ရာဝီဝမ်က “ကယ်ဆယ်ရေးအဖွဲ့တွေက အပျက်အစီးတွေကို ဂရုတစိုက် ဖယ်ရှားပြီး ညွှန်ပြထားတဲ့ နေရာတွေကို ဝင်ရောက်ဖို့ လုပ်ဆောင်နေပါတယ်။ ဇုန် A နဲ့ D မှာ နောက်ထပ်ရှာဖွေမှုတွေ ဆက်လက်လုပ်ဆောင်နေပြီး သဲအလွှာအထိ တူးဖော်ဖို့ အစီအစဥ်ရှိပါတယ်။ သာမန်မဟုတ်တဲ့ အခြေအနေ မတွေ့ရဘူးဆိုရင်တော့ အဲဒီနေရာတွေမှာ လုပ်ငန်းတွေ မကြာမီ ပြီးဆုံးမှာပါ” လို့ ပြောပါတယ်။

ဘန်ကောက်မြို့တော် အုပ်ချုပ်ရေးအဖွဲ့ (BMA) ရဲ့ ကိန်းဂဏန်းအချက်အလက်တွေအရ မေ ၇ ရက်အထိ ထိခိုက်သူ စုစုပေါင်း ၁၀၉ ယောက် ရှိကြောင်း ထုတ်ပြန်ထားသလို အဲဒီထဲက ၈၈ ယောက် သေဆုံးပြီး ၉ ယောက် ထိခိုက်ဒဏ်ရာရရှိခဲ့ကာ ၁၂ ယောက်ကတော့ ပျောက်ဆုံးနေဆဲဖြစ်တယ်လို့ ဆိုပါတယ်။

လက်ရှိမှာတော့ နောက်ထပ် အသက်ရှင်ကျန်ရစ်သူ မတွေ့ပါက ကယ်ဆယ်ရေးလုပ်ငန်းတွေကို ပိတ်သိမ်းဖို့ စဉ်းစားမှာဖြစ်ပြီး ၂ ရက်အတွင်း အပြီးသတ်ဆုံးဖြတ်ချက်ချနိုင်ဖို့ မျှော်မှန်းထားကြောင်း ချတ်တူချတ်နယ်မြေ အုပ်ချုပ်ရေးမှူးက ပြောပါတယ်။

ထိုင်းမိုးလေဝသဌာန၊ မြေငလျင်စောင့်ကြည့်ရေးဌာနရဲ့ လေ့လာစောင့်ကြည့်မှုအရ ထိုင်းနဲ့ မြန်မာနိုင်ငံတွေကို ဗဟိုပြုလှုပ်ခတ်ခဲ့တဲ့ အင်အားပြင်း ငလျင်လှုပ်ခတ်ပြီးနောက် စုစုပေါင်း နောက်ဆက်တွဲငလျင်တွေ အကြိမ်ရေ ၆၀၀ ထက်မနည်း လှုပ်ခတ်ခဲ့တယ်လို့ သတင်းထုတ်ပြန်ထားခဲ့ပါတယ်။

Source:  The Nation Thailand