စစ်ကောင်စီက တဖက်မှာအပစ်ရပ် ကြေညာထားပြီး တဖက်မှာ အပြစ်မဲ့ပြည်သူတွေကို ပစ်မှတ်ထား လေကြောင်းတိုက်ခိုက်မှုကြောင့် ဧပြီ ၁ ရက်ကနေ ၃၀ ရက်နေ့အထိ တလအတွင်းမှာ အမျိုးသမီး ၇၁ ယောက်အထိ သေဆုံးခဲ့တယ်လို့ မြန်မာ့အမျိုးသမီးသမဂ္ဂ (BWU)က မေ ၆ ရက်မှာ သတင်းထုတ်ပြန်ပါတယ်။
ဧပြီလအတွင်း စစ်တပ်ရဲ့ လေကြောင်းကနေ ဗုံးကြဲတိုက်ခိုက်မှုကြောင့် သေဆုံးသူ ၅၉ ယောက်၊ ကျေးရွာနဲ့ နေအိမ်တွေကို ပစ်မှတ်ထား လက်နက်ကြီးပစ်ခတ်မှုကြောင့် သေဆုံးသူ ၇ ယောက်နဲ့ စစ်တပ်က သတ်ဖြတ်မှုကြောင့် သေဆုံးသူ ၅ ယောက်အထိရှိခဲ့ပြီး အဲဒီအထဲမှာ ၁၃ ယောက်ဟာ ၁၈ နှစ်အောက် ကလေးငယ်တွေ ဖြစ်တယ်လို့ ဆိုပါတယ်။
ဒါ့အပြင်ဧပြီလအတွင်း ထိခိုက်ဒဏ်ရာရရှိသူတွေမှာ စစ်တပ်ရဲ့ လေကြောင်း တိုက်ခိုက်မှုကြောင့် အယောက် ၄၀ ၊ လက်နက်ကြီးပစ်ခတ်မှုကြောင့် ၅ ယောက်၊ မြေမြှုပ်မိုင်းကြောင့် ၄ ယောက်နဲ့ အာရက္ခတပ်ဖွဲ့ဝင်ရဲ့ မုဒိမ်းကျင့်မှုကြောင့် ၁ ယောက်တို့ဖြစ်တယ်လို့ ထုတ်ပြန်ချက်မှာ ပါရှိပါတယ်။
ဧပြီလအတွင်း သေဆုံးသွားသူ အမျိုးသမီးတွေထဲမှာ စစ်ကိုင်းတိုင်းက အယောက် ၃၀ နဲ့ အများဆုံး ဖြစ်ပြီး မန္တလေးတိုင်းမှာ ၁၄ ယောက်နဲ့ ပဲခူးတိုင်းမှာ ၅ ယောက်တို့ ဖြစ်တယ်လို့ ထုတ်ပြန်ချက်အရ သိရပါတယ်။
ကေခိုင်
