မန္တလေးတိုင်း၊ ကျောက်ပန်းတောင်းမြို့နယ်ထဲကို စစ်ကြောင်းထိုးနေတဲ့ စစ်ကောင်စီ တပ်ဖွဲ့ဝင်တွေဟာ မေ ၄ ရက်နဲ့ ၅ ရက်တွေမှာ အရပ်သား ၂ ယောက်ကို သတ်ဖြတ်ခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ညောင်ဦးအခြေစိုက်တော်လှန်ရေးတပ်ဖွဲ့တခုရဲ့ ဒုတာဝန်ခံက “ငါ့သရောက်မြို့နယ်ခွဲကနေ အင်အား ၁၂၀ ဝန်းကျင်လောက်နဲ့ ထွက်လာတဲ့ စစ်တပ်စစ်ကြောင်းက ကျောက်ပန်းတောင်း တောင်ဘက်ခြမ်းမှာရှိတဲ့ ရွာတွေဘက်ကို စစ်ကြောင်းထိုးရင်း အရပ်သားပြည်သူ ၃၀ ကျော်လောက်ကို လူသားဒိုင်းလုပ်ပြီး ဖမ်းခေါ်သွားကြတယ်။ အပြစ်မဲ့ပြည်သူ ၂ ယောက်ကိုလည်း အကြောင်းမရှိ သတ်ဖြတ်သွားကြတယ်” လို့ ပြောပါတယ်။

အဲဒီစစ်ကောင်စီစစ်ကြောင်းဟာ ပြီးခဲ့တဲ့ မေ ၂ ရက်ကစတင်ပြီး ကျောက်ပန်းတောင်းမြို့ရဲ့ တောင်ဘက်ခြမ်းမှာ ရှိကြတဲ့ ကမ်းဖြူ၊ ကြို့ပင်သာ၊ ထောက်ဝ၊ ကူတော၊ အို့ရင်းနဲ့ ကြီးကန်ကျေးရွာတွေဘက်ကို စစ်ကြောင်းထိုးရင်း အပြစ်မဲ့ပြည်သူတွေကို သတ်ဖြတ်သွားတာလို့ ဆိုပါတယ်။

ညောင်ဦးမြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံက“ကျနော်တို့ သိရတာတော့ ပြည်သူ ၂ ယောက် အသတ်ခံရတယ်ပေါ့နော်။ အသတ်ခံရတဲ့ ၂ ယောက်လုံး ကမ်းဖြူရွာကပါ။ တယောက်က ကမ်းဖြူ လယ်ပြင်သာတဲတိုက်က ကိုရင်လူထွက် ထန်းတက်သမား ကိုရင်ကြီး ဆိုတဲ့ အသက် ၂၀ တောင်မပြည့်သေးတဲ့ လူငယ်ပါ။ သူက စစ်ကြောင်းဝင်လာလို့ ထွက်ပြေးတာကို နောက်ကနေ စစ်သား ၃၊ ၄ ယောက်က သေနတ်နဲ့ လိုက်ပစ်တာခံရတာ။ ပေါင်နဲ့ဗိုက်တွေကို ကျည်ထိပြီး နေရာတင် ပွဲချင်းပြီးဆုံးသွားတာပါ။ နောက်တယောက်က ကိုအောင်ဆန်းဝင်း ပါ။ သူကတော့ အသက် ၃၀ လောက်ရှိမယ်။ နောက်တနေ့ စစ်ကြောင်းပြန်ထွက်ခါနီးမှာ ခြေထောက်တွေ ကြိုးနဲ့ချည်ထားပြီးတော့ ဗိုက်ကို ဓားနဲ့ခွဲ၊ လည်ပင်းလှီးပြီး ရက်ရက်စက်စက် သတ်ဖြတ်သွားခဲ့ကြပြီးတော့ စစ်ကြောင်းက ငါ့သ​ရောက်မြို့နယ်ခွဲဘက်ကို ပြန်ဆုတ်သွားကြတယ်” လို့ DVB ကို ပြောပါတယ်။

စစ်ကောင်စီတပ်ဖွဲ့ဝင်တွေဟာ ထန်းတက်သမား ကိုရင်ကြီးကို မေ ၄ ရက်နဲ့ ကိုအောင်ဆန်းဝင်း ကို မေ ၅ ရက် မနက်ပိုင်းမှာ သတ်ဖြတ်ခဲ့တာလို့ ဆိုပါတယ်။

ဧပြီ ၂၆ ရက်မှာ ငါ့သရောက်မြို့နယ်ခွဲရဲစခန်းကနေ ထွက်လာတဲ့ အဆိုပါ စစ်ကောင်စီစစ်ကြောင်းဟာ ကျောင်ပန်းတောင်းမြို့နယ်ထဲအရောက် ဧပြီ ၂၇ ရက်ကစတင်ကာ တော်လှန်ရေးတပ်ဖွဲ့တွေရဲ့ ၂ ရက်ဆက် ကြားဖြတ်တိုက်ခိုက်ခံခဲ့ရလို့ အများအပြား သေဆုံး ဒဏ်ရာရခဲ့ကြပြီး စစ်သုံ့ပန်း ၂ ဦးကို အရှင်ဖမ်းမိခဲ့သလို လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။