အိန္ဒိယရဲ့ ကျူးကျော်မှုအတွက် ပြင်ဆင်နေတယ်လို့ ပြောအပြီး ပါကစ္စတန်အစိုးရက မေ ၅ ရက်မှာ ၃ ရက်အတွင်း ဒုတိယအကြိမ်အဖြစ် ဒုံးကျည်စမ်းသပ်ပစ်လွှတ်ခဲ့ပါတယ်။

ကက်ရှ်မီးယားက အကြမ်းဖက်မှုကြောင့် ပါကစ္စတန်အစိုးရရဲ့ စီးပွားရေးပြုပြင်ပြောင်းလဲမှုတွေ နောက်ပြန်ဆုတ်သွားစေနိုင်တယ်လို့ အိန္ဒိယဝန်ကြီးချုပ် နာရန်ဒြာမိုဒီက သတိပေးခဲ့ပါတယ်။

အိန္ဒိယ အုပ်ချုပ်တဲ့ ကက်ရှ်မီးယားပြည်နယ် အစိတ်အပိုင်းထဲက ပါဟယ်ဂမ် တောင်ပေါ်စခန်းနား ဘိုင်ဆာရန်ချိုင့်ဝှမ်းမှာ ဟိန္ဒူခရီးသွားတွေကို ပစ်မှတ်ထားတဲ့ ဧပြီ ၂၂ ရက်က တိုက်ခိုက်မှုအတွင်း သေနတ်သမားတွေက လူ ၂၆ ယောက်ကို သတ်ခဲ့ပြီးကတည်းက နျူကလီးယားလက်နက်ပိုင်တဲ့ အိမ်နီးချင်းတွေကြား ဆက်ဆံရေးတွေ ယိုယွင်းလာခဲ့ပါတယ်။

ဒီဖြစ်ရပ်မှာ ပါကစ္စတန်က ပါဝင်ပတ်သက်တယ်လို့ အိန္ဒိယက စွပ်စွဲထားပါတယ်။ ပါကစ္စတန် အစိုးရက စွပ်စွဲချက်တွေကို ငြင်းဆိုထားပေမဲ့ မကြာမီ အိန္ဒိယအစိုးရက ပါကစ္စတန်ကို စစ်ရေးအရ အရေးယူဖို့ ရည်ရွယ်ထားတယ်လို့ ပါကစ္စတန် ထောက်လှမ်းရေးက ပြောထားပါတယ်။

ကက်ရ်ှမီးယားနယ်စပ်မှာ သံတမန်ရေးဆိုင်ရာ ပေါက်ကွဲသံတွေ၊ လက်နက်ငယ်တွေနဲ့ အပြန်အလှန် ပစ်ခတ်မှုတွေကြောင့် ကမ္ဘာနဲ့ ဒေသတွင်း အင်အားကြီးနိုင်ငံတွေ ထိတ်လန့်ခဲ့ပါတယ်။

အိန္ဒိယ ပြည်ထဲရေးဝန်ကြီးဌာနက ပြည်နယ်အများအပြားမှာ အရပ်ဘက်ဆိုင်ရာ ကြိုတင်ပြင်ဆင်မှု သေချာစေရေး မေ ၇ ရက်မှာ လုံခြုံရေးဆိုင်ရာ စစ်ရေးလေ့ကျင့်ဖို့ တောင်းဆိုခဲ့တယ်လို့ အစိုးရ သတင်းရင်းမြစ်တခုက မေ ၅ ရက်မှာ ရိုက်တာသတင်းဌာနကို ပြောခဲ့ပါတယ်။

စစ်ရေးလေ့ကျင့်မှုထဲမှာ လေကြောင်းတိုက်ခိုက်မှု သတိပေးချက် ဥသြသံတွေ အကောင်အထည်ဖော်တာ၊ ဘေးလွတ်ရာ ရွှေ့ပြောင်းဖို့ အစီအစဥ်တွေ မွမ်းမံပြင်ဆင်တာနဲ့ တိုက်ခိုက်မှု တစုံတရာဖြစ်ခဲ့ရင် တုံ့ပြန်ဖို့ လူ့အဖွဲ့အစည်းဝင်တွေကို လေ့ကျင့်ပေးတာ စတာတွေ ပါပါတယ်။

တင်းမာမှုတွေကြောင့် ကုလသမဂ္ဂ အတွင်းရေးမှူးချုပ်က ဆက်ဆံရေး ရေဆူမှတ်ကို ရောက်နေတာ တွေ့ရလို့ စိတ်မကောင်း ဖြစ်မိပါတယ်လို့ ပြောပါတယ်။

အရပ်သားတွေကို ပစ်မှတ်ထားတာဟာ လက်ခံနိုင်စရာ မရှိသလို တာဝန်ရှိတဲ့သူတွေကို တရားမျှတမှုရှိရှိ ဘက်မလိုက်၊ တရားဝင်တဲ့ နည်းလမ်းတွေနဲ့ တရားစီရင်ရမယ်၊ လွယ်လွယ်လေး ထိန်းမနိုင်သိမ်းမရ ဖြစ်သွားနိုင်တဲ့ စစ်ရေး ထိပ်တိုက်တွေ့တာမျိုးတွေကို ရှောင်ဖို့ ဒီအချိန်က သေရေးရှင်ရေးတမျှ အရေးကြီးတယ်လို့ သူက ဆက်ပြောပါတယ်။

မနှစ်က မူလခြိမ်းခြောက်မှုကို ရှောင်လွှဲပြီးတဲ့နောက် နိုင်ငံတကာ ငွေကြေးရန်ပုံငွေအဖွဲ့က ဒေါ်လာ ၇ ဘီလီယံ ထောက်ပံ့ရေး အစီအစဉ်ကို ရယူပြီး စီးပွားရေး ပြန်လည်နာလန်ထူဖို့ လမ်းကြောင်းပေါ်မှာရှိနေတဲ့ ပါကစ္စတန်ရဲ့ စီးပွားရေးဟာ အခုလို အငြင်းအခုန်ကြောင့် ဒေါ်လာ ၃၅၀ ဘီလီယံလောက် ထိခိုက်နိုင်တယ်လို့ အိန္ဒိယဝန်ကြီးချုပ်က ပြောခဲ့ပါတယ်။

Source: Reuters